Vordagskráin 2015

posted Feb 25, 2015, 7:37 AM by Vefstjóri heimasíðu

Ágæta félagskona!

Einu sinni enn er nýtt ár gengið í garð, með nýjum væntingum og vonandi gleði.
Stjórnin sendir ykkur og ykkar fjölskyldum bestu nýársóskir með þakklæti fyrir góða og skemmtilega samveru á liðnu ári. Við höldum áfram að hittast á Grand Hótel á mánudögum kl. 19:00. Þar höfum við verið velkomnar og vel tekið á móti okkur.

  • Mánudaginn 2. mars kl. 19:00 byrjum við að vanda með sameiginlegum kvöldverði. Svo kemur Sigríður Arnardóttir eða Sirrý eins og hún er kölluð, til okkar og flytur erindið "Laðaðu til þín það góða" sem okkur í stjórninni finnst spennandi.
  • Laugardaginn 11. apríl (laugardaginn eftir páska) er óvissuferðin okkar og þá þurfa félagskonur að skrá sig tímanlega í ferðina svo hægt sé að panta rútu við hæfi.
    Lagt verður af stað frá bílastæðinu fyrir aftan kirkjuna í Mjóddinni kl. 14:00.
  • Sunnudaginn 10. maí er Lokakaffið á Grand Hótel kl. 14:00-17:00, frábært veislukaffi hjá þeim og kjörið tækifæri til að hitta Vestmannaeyinga og spjalla yfir góðum kaffisopa. Líka gott tækifæri til að bjóða fjölskyldunni í kaffi.
  • Mánudaginn 18. maí kl. 19:00 er aðalfundur með venjuleg aðalfundarstörf. Þá þarf að kjósa nýja stjórn til 3ja ára og vonandi eru einhverjar sem eru tilbúnar í slaginn. Þetta er verðugt verkefni fyrir vinkonur eða mæðgur að taka þetta að sér, gefandi og lærdómsríkt. Svo verður eitthvað til skemmtunar eftir aðalfundastörfin sem verður sett á heimasíðuna okkar www.heimaey.org þegar nær dregur.
Svo er sumarferðin okkar næst á dagskrá í júní. Nýja ferðanefndin stefnir á dagsferð þetta árið og verður sagt nánar frá ferðinni á heimasíðunni og á aðalfundinum.

Á þessu ári þarf að prenta nýja félagaskrá því síðasta skráin er orðin 3ja ára.
Vildum við biðja ykkur að kíkja í skrána sem við notum í dag og athuga hvort einhverju þurfi að breyta hjá ykkur, t.d. heimilisfangi eða tölvupóstfangi og láta okkur í stjórninni vita, annaðhvort með tölvupósti, símtali eða á næstu fundum.
Félagaskráin þarf að vera rétt.

Svo að lokum vonum við að sjá ykkur sem flestar á fundum því það er svo gaman þegar vel er mætt, mikið spjallað og hlegið og hljómurinn í húsinu eins og í fuglabjargi heima í Eyjum. Það er yndislegt.
Munið að gestir eru hjartanlega velkomnir eins og ætíð.

Bestu kveðjur til ykkar allra

Dollý 898-0076 skrifstofa@suzuki.is
Sirrý 899-1153 sirryl@simnet.is
Jóna Björg 894-6965 jona.b@simnet.is

Spakmæli dagsins: Vel valin orð, sögð á réttu augnabliki eru gleðigjafi.
Comments